Rajah dina Novel Roman Sejarah “Wastu Kancana” karya Drs. Yoséph Iskandar

Rajah Pamunah dina bubuka

 

Pun Sapun!

Ka Gusti Nu Maha Suci

Ka Rumuhun ka Karuhun

Ka sakumna Lelembutan

Nu narindak teu narapak

Nu nyowara tan rupana

Amit kami seja mipit

Amit kula seja ngala

Carita mangsa bihari

Laratan Pasundan Bubat

Nu ngamalir dina getih

Ngamuara dina rasa

Ngadangdiang dina sukma

Méméh ngajamparing ati

Kapentang kapanah bayah

Pangrajahkeun pangmunahkeun

Muga jembar na panalar

Paralun!

Rajah Panutup

Pun Sapun Awignam Astu

Ka Ratu Hyang Prabu Wastu

Ludeungkeun kami ngagurit

Prasasti dina prasasti

Kawali implengan diri

Clik putih clak hérang caang

Hampura mun kurang padang

Sakadugana sakatepina

Pun Sapun, ampun paralun!

Paralun ka para Karuhun

Hampura nyanggi carita

Bisi ipis gurit amit

Bisi atah nya pangrajah

Kami seja ménta ampun

Muga jembar pangampura

Dina lebah teu kaaji

Dina tujul teu ka ajul

Paralun ampun paralun

Paralun ka Hyang Ruuhun

Hampura medar lalakon

Bisi leuwih pangneukteukeun

Bisi kurang pangnambahkeun

Muga surti panalarna

Dina sajatining Sunda

Dina cikawening ati

Paralun ampun paralun!

~Drs. Yoséph Iskandar 9 Agustus 1987~

dina bukuna "Wastu Kancana"